O Balneario: As augas das que Carballo naceu

Carballo non chegaría a ser a vila que é se non fora pola descuberta, no século XVIII, dun manancial de augas termais. Aínda hoxe en día este é o único balneario mineiro-medicinal da Costa da Morte.
O descubrimento deulle un futuro a Carballo, mais tamén un pasado. Deulle un futuro, porque o que até entón era só unha aldea comezaría a medrar até converterse en núcleo urbano e capital da comarca. E descubriulle un pasado, porque excavacións realizadas na época destaparon restos dun balneario anterior que pode datar da época romana.
Carballo, ao igual que outras importantes vilas termais, como Caldas, está á beira da Depresión Meridiana, sucesión de fallas que cruza Galicia de Norte a Sur.
Estas augas emerxen a 42º e contan cun alto contido en xofre, sodio e bicarbonato. Recoméndanse  para problemas de ósos, mais tamén para afeccións respiratorias, dixestivas e do sistema nervioso e circulatorio.