Este que foi no pasado lugar de prisión ten hoxe en día as súas portas abertas para darnos a coñecer a comarca. O edificio, construído en 1855 como cárcere do partido xudicial, foi rehabilitado hai uns anos polo coñecido arquitecto galego Manuel Gallego Jorreto e comezou unha nova vida en 2002 como Museo de Bergantiños. As dependencias tamén albergan na actualidade a Oficina de Información Turística.
Os cuartos que antes eran celas fálannos agora da identidade bergantiñá: os seus costumes, as súas tradicións, a súa xeografía e historia… A través delas poderás coñecer máis sobre a nosa paisaxe, a nosa tradición agrícola, o pan, que é o noso produto estrela, ou sobre o pasado e os persoeiros ilustres de Carballo, e atoparás mesmo unha lareira tradicional. No patio central, varios paneis fálannos da antiga liña de trolebuses Carballo-A Coruña, a primeira liña de estrada que se electrificou en España.