Praza do Concello: Lugar para o encontro

Espazo da feira e do mercado, sede do concello e lugar para o ocio, a Praza do Concello é o corazón da vida política, comercial e social de Carballo.
Esta praza ten orixe nos anos 20 do século pasado, cando o medre da vila fixo necesario construír un ensanche no lugar no que te encontras. Algunha das árbores que conforman o actual xardín foron prantadas naquela época e son case centenarias. Tamén entón foron contruídas unha fermosa sede para o concello, de aire modernista, que nos anos 70 sería derrubada e substituída polo actual, e unha escola que aínda podes ver en pé, agora convertida en ludoteca.
Todos os xoves e o segundo, cuarto, e de habelo, quinto domingo do mes celébrase aquí unha das feiras máis concorridas da comarca. No mercado, recentemente renovado, encontrarás os mellores produtos das terras e dos mares bergantiñáns.