O carballés Alfredo Brañas foi un dos fundadores do rexionalismo galego, un dos primeiros movementos en reivindicar para Galicia a súa identidade diferencial. A el dedicoulle o concello de Carballo esta escultura, que foi inaugurada no ano 2005.
Este Alfredo Brañas moldeado en bronce, inspirado nun óleo de Fenollera, descansa á beira da casa na que veu ao mundo o político e escritor rexionalista, en 1859. A escultura é obra de César Lombera, o mesmo escultor que creou, para a Alameda de Santiago de Compostela, as figuras en homenaxe ás Marías e a Valle Inclán.
Este intelectual, autor de El regionalismo, obra de gran repercusión, labrou para Galicia todo un proxecto político. Mesmo chegou a configurar Brañas a distribución de competencias entre o poder central e o rexional nunha época na que non se concibía máis poder que o centralizado en mans do Estado.