O Faro da Porta

Desde este lugar, no entorno do faro da Porta, construído en 1918 e que toma o nome da perigosa canle existente entre a illa do Faro e a illa do Sur, o chamado Freu da Porta na punta Canabal, poderémonos facer unha idea do que ocorre no medio mariño, nestes ecosistemas submarinos que máis riqueza, biodiversidade e valor albergan no Parque, principal causa que motivará a declaración das illas como Parque Nacional Marítimo Terrestre das Illas Atlánticas de Galicia, que xunto ao arquipélago de Cabrera no mar Mediterráneo, son os dous únicos Parques Nacionais (dun total de 15) coa característica de ter unha parte importante da súa superficie protexida, marítima.

O 86 % da superficie do Parque é marítima dando así conta da importancia que ten o seu medio mariño.

Aquí poderemos descubrir a variedade e diversidade dos fondos mariños, a que nos referimos coa zonación litoral, o significado da  ardora, a influencia das mareas ou a presenza de mamíferos mariños.