16. Arquivo do Reino de Galicia

O Arquivo do Reino de Galicia localízase nun edificio de estilo ecléctico deseñado polo arquitecto municipal Antonio Tenreiro e inaugurado en 1955. A fachada principal está orientada ao xardín de San Carlos e accédese ao interior a través dun arco de medio punto coroado polo escudo do Reino de Galicia. Este arco configura tamén un pasadizo que une o xardín coa rúa San Carlos.

O arquivo é unha institución creada no ano 1755 para custodiar a documentación da Real Audiencia de Galicia, e a súa substituta, a Audiencia Territorial da Coruña. Durante os séculos XIX e XX comezou a recibir tamén fondos doutras institucións como a Real Intendencia de Galicia ou o antigo Xulgado de Correos. Actualmente exerce as funcións de Arquivo Histórico de Galicia e de Arquivo Histórico Provincial.

Os catro andares do edificio contan con zona de recepción, sala de exposicións, sala de xuntas, sala de conferencias, postos de consulta, dependencias para traballos técnicos, laboratorios e obradoiros de restauración. No seu interior custódianse documentos de gran valor histórico como o mapa Ojea de Galicia de 1598, un tombo do mosteiro de Sobrado dos Monxes ou a causa xudicial de Manuel Blanco Romasanta.