A casa museo de María Pita sitúase sobre o solar que no século XVI ocupaba unha vivenda propiedade de Juan Alonso de Rois, primeiro marido da heroína coruñesa. Á súa morte o inmoble pasou como herdanza á filla do matrimonio, María Alonso de Rois.
Na exposición permanente recréanse dúas dependencias da casa dos pais de María Pita, a tenda, que se atopaba no baixo e o dormitorio principal. Ademais faise un percorrido pola historia do Reino de Galicia e A Coruña nos séculos XVI e XVII, así como polas causas e desenvolvemento do ataque inglés de 1589.
María Pita, que en realidade se chamaba Mayor Fernández de Cámara e Pita, é célebre polo seu transcendente papel durante o asedio do corsario Inglés Sir Francis Drake á cidade da Coruña en maio de 1589. No transcurso da batalla morreu o seu terceiro marido Gregorio Rocamonde e cando a toma da muralla parecía consumada, María logrou matar o alférez inglés que dirixía o asalto arrebatándolle a lanza da bandeira. Segundo a tradición, este acto e o seu berro “Quen teña honra que me siga” infundiron ánimo aos defensores para desbotar o ataque.