11. Goberno Militar

No solar que ocupa o edificio do Goberno militar estivo o palacio dos marqueses de Montaos, que foi construído en 1520 e doado á Real Facenda en 1640. A inicios do século XVIII instalouse nel a Veeduría e Contaduría do Exército de Galicia, que finalmente acabaría por dar nome á rúa da fachada principal. Este era un corpo integrado na Intendencia do exército encargado da supervisión económica, comprobación das contas, control de fraudes, etc. Durante o mesmo século foi temporalmente vivenda de dous Capitáns Xerais de Galicia, en especial de Carlos Francisco de Croix, pero sobre todo funcionou como residencia dos Intendentes Xerais do Reino de Galicia. En 1875 o edificio foi ocupado polo Goberno Civil e pouco tempo despois instalouse aquí o Goberno Militar, permanecendo en mans do exército até o ano 2009.

O actual inmoble é unha construción reformada en 1758 polo enxeñeiro militar Antonio Gaver, aínda que posteriormente foi sometida a diferentes remodelacións para adaptala aos seus usos sucesivos. Trátase dun característico palacio do XVIII con portada barroca, coroada con escudo e dotado de pequenos balcóns con viseiras de estilo francés. Hoxe en día, o lado oeste do edificio é a sede do Centro Cívico Cidade Vella.