9. Museo de Arte Sacra

O Museo de Arte Sacra localízase nun pequeno edificio de nova planta a carón do lateral norte da Colexiata de Santa María do Campo. O deseño correu a cargo do arquitecto Manuel Gallego Jorreto e o seu interior organízase ao redor dunha escaleira central que vertebra a exposición permanente.

O museo acolle unha importante colección de ourivaría datada entre os séculos XVI e XIX pertencente á colexiata. As dúas pezas máis importantes son a arqueta eucarística (1691) e a custodia (1695) doadas ao templo por María Ana de Neoburgo, segunda muller de Carlos II. A raíña casou por poderes en 1689 e o ano seguinte emprendeu viaxe por mar cara a España. As malas condicións atmosféricas fixeron que embarrancase en Ferrol e posteriormente chegou por terra á Coruña, onde foi recibida con honras pola poboación. En agradecemento, tempo despois, regalou á Colexiata estas dúas impresionantes pezas de prata do barroco alemán realizadas polo mesmo autor, Johann Sebastian Mylius.

O resto de obxectos litúrxicos expostos son unha variada mostra de cálices, navetas, incensarios, relicarios cetros e cruces pertencentes ás máis importantes escolas de prateiros como a coruñesa, cordobesa, salmantina ou compostelá.