Tamén coñecido como Faro de Punta Insua, trátase dunha edificación que merece ser visitada dada a súa singularidade arquitectónica e a fermosura do lugar no que se sitúa, sobre todo as súas postas de sol. Construíuse durante os anos comprendidos entre 1913 e 1921. Atópase en Punta Insua, que constitúe o punto xeográfico que axuda a fixar a entrada no arco de Fisterra e a ría de Corcubión, co fin de completar o sistema de iluminación dos faros de Corrubedo e Fisterra. Trátase dun amplo edificio con planta en forma de U, obra do enxeñeiro Salvador López Miño, construído en pedra, e pintado de branco.
Pegado ao muro oeste, levántase maxestosamente a torre do faro, de 14 metros de altura, coroada por unha cúpula cun catavento metálico, onde figura o ano da súa inauguración: 1920. Ata finais dos anos 80 foi a residencia dos sucesivos fareiros e das súas familias e a partir de 2021 habilítase como establecemento de aloxamento turístico, para converterse nun dos hoteis máis singulares e exquisitos de toda Galicia, pero conservando a súa finalidade principal como faro.
Na actualidade o faro emite unha luz branca e vermella que alcanza unha distancia de 20 millas. A zona á beira do faro conta cunha das mellores praias do litoral e irradia tranquilidade e acougo, con belas panorámicas que ofrecen unha posta de sol sobre o océano inesquecible.