A cidade de Betanzos e a corrente do Mandeo protagonizan moitos dos lenzos de Francisco Lloréns. As tres barcas é unha das obras máis monumentais das creadas por este artista durante a súa estancia en Betanzos en 1919. Neste lenzo, o pintor sitúase nun punto de vista moi baixo, desde a ribeira contraria do río, e ofrécenos, a primeira vista, a masa de auga do río Mandeo, os peiraos e as barcas que centran a atención na parte inferior do cadro, opoñendo liñas curvas e rectas, movemento e calma.
A parte superior está ocupada polas casas dun barrio popular; con multitude de detalles que falan da vida cotiá. O millo está a secar na solaina, a roupa lavada no río…
Técnica: Óleo sobre lenzo
Dimensións: 101 x 85 cm.
Colección Fundación Barrié.