PALCO DA MUSICA

Obra de Rafael González Villar é un belo exemplo da tipoloxía de palco ou quiosco da música tan presente en Galicia a partir do século XIX. Substitúe a outro de 1904 feito todo de madeira. Construíuse en dúas fase: primeiro o baseamento cara a 1913 e logo termínase o fornelo coa súa característica cuberta en 1927. Expúxose con dobre obxectivo: funcional como lugar para que toque a banda e outro ornamental como elemento singular da praza.

¿Sabías que no palco de madeira tivo lugar un feito histórico o primeiro mitin en galego? Pronunciado por Manuel Lugrís Freire o 6 de outubro de 1907 nun acto organizado por “Solidariedade Galega”.

Rafael González Villar (1887-1941) foi un dos mellores arquitectos de Galicia. Estudou en Madrid, pero toda a súa obra é en Galicia, especialmente na Coruña e Betanzos, lugares onde foi arquitecto municipal. A súa obra máis coñecida é o Kiosko Alfonso nos Xardíns de Méndez Núñez da cidade herculina, outra obra para destacar é o Chalé Rialeda en Oleiros. Son da súa autoría en Betanzos:


Escolas Jesús García Naveira
Casa do Pobo
Reforma do Edificio Arquivo do Reino de Galicia
Proxecto Cinema Alfonsetti (non realizado)
Bancos Praza Irmáns García Naveira
Casa Núñez
Fábrica da Electricidade
Palco da Música
Placa conmemorativa a Manuel Naveira.
Cinema Capitol