Situado na parte máis alta do antigo Castro de Untia e enfrontando á igrexa gótica de Santiago atópase este exemplo de casa da nobreza medieval. A orixe é unha casa da familia Vilousaz e Lanzós que se reconstruíu entre 1620 e 1625 polo mal estado do edificio. Neste edificio exercíase xurisdición criminal e civil. Destaca na fachada o balcón e o escudo do primeiro conde de Maceda, don Alonso Lanzós Novoa e Andrade.
¿Sabías que Nesta casa viviu Alonso de Lanzós, un dos líderes da Gran Guerra Irmandiña?. A Gran Guerra Irmandiña (en referencia ás milicias urbanas denominadas irmandades) foi unha revolta social que tivo lugar en Galicia entre 1467 e 1469, e foi posiblemente a maior revolta europea de todo o século XV. Comezou na primavera de 1467 en Galicia, nunha situación de conflito social (fame, epidemias e abusos por parte da nobreza galega) e político (guerra civil en Castela). A Santa Irmandade, xurdida e xustificada por tal situación, tornouse nunha revolta como reacción a un sentimento acumulado de agravio polos males e danos que o pobo recibía dos nobres das fortalezas.
A Torre de Vilousaz ou Lanzós é un elemento de defensa e vixilancia da cidade e ademais símbolo de autoridade e poder. Ten planta cuadrangular con cuberta de forma piramidal de madeira. A altura é de 12,5 metros. Á cuberta coñecíaselle como o chapeu e desapareceu no incendio xeral da cidade de 1616. O edificio está hoxe en día restaurado.