ANTIGO MATADOIRO

Segundo a documentación o primeiro proxecto de construción dun matadoiro na cidade de Betanzos é aprobado polo Consello de Castela en 1798, pero non é ata 1901 cando o entón arquitecto municipal de Lugo, Juan Álvarez de Mendoza, proxecta o edificio que foi construído entre 1903 e 1910.

Sitúase nunha zona próxima a cidade, pero á vez a unha distancia suficiente para evitar as molestias da actividade que se desenvolve. Así mesmo aprovéitase a proximidade aos ríos e Ría de Betanzos para o transporte dos animais e para a evacuación de augas residuais.

¿Sabías que Juan Álvarez de Mendoza é o autor tamén do Monumento aos Mártires de Carral, situado no centro desta localidade próxima a Betanzos?. Coñécese como os Mártires de Carral a doce militares rebeldes fusilados nesta localidade, o 26 de abril de 1846, once deles na parroquia de Paleo, e un en Betanzos, o 4 de maio de 1846, por personificar a rebelión contra o réxime absolutista do Xeneral Narváez durante o reinado de Isabel II.

O edificio está construído nun estilo neomudéjar con detalles ornamentais do modernismo como pode ser o acabado cerámico onde se le “Matadero”, utilizando unha tipografía alemá de 1904 coñecida como “Arnold Böcklin”. Pódese ver tamén influencia neste edificio doutro matadoiro moi coñecido, neste caso do da vila de Madrid obra de Luís Bellido que compartiu traballo en Lugo e en Gijón con Mendoza, e quizais mantivesen ademais unha relación de amizade.