9 - Kaskaborro VTT

Idauzeko elizako aparkalekutik, D147 errepidera itzuli eta eskuinera hartu Maulerantz. 700 metroren ondoren, zubia pasatu eta, ezkerrera joan Metateako bide asfaltatutik. Laster bidezidor harritsua bilakatzen da; eskuineko bidexka aldapatsua utzi eta ibarxkaren hondoko bidexkatik jarraitu, errekatxoaren bazterretik. Bi argiguneren oinean (1,7 km), kontuz eta ezkerrera joan bi hesiren artean gorantz doan bidexka belartsutik. Goian, jarraitu ezkerretik mendi-lepoa igarotzeko (haritzak) eta lehen jaitsiera abiatu bidexka lurtsu eta harritsutik. Behean, eskuineko bidean egon.

Aphura errekaren gaineko zubi zaharra ezkerretara utzi (2,8 km) eta eskuinera igo bigarren mailako errepidetik. Haran berri baterantz igotzen da. Bixkorreko bide asfaltatuan jarraitu (% 20ko igarobide aldapatsua). Belardien arteko zapaldaren ondoren, Arbeko bordaren ondoko bide harriztatutik jarraitzen du igoerak. Muinoko bidegurutzera iristean (4,5 km), haritzen itzalpean, eskuinera hartu, bide harritsu berritik. Bidea lehenik horizontala da, laster domo bat saihesten du eskuinetik, eta Behaiako gurutzeko lepora iristen da: handik, Urdiñarbe inguruko harana ikusten da (San Antoni kapera goian duela) edo Auñamendi. Ondotik, pista herrirantz jaisten da eta eskuinetara bide asfaltatua bilakatzen da.

Urdiñarben sartu elizako auzotik (6,4 km): ezkerrera jaitsi arku-zubirantz eta, eskolaren eta pilota plazaren arteko bidegurutzean, ezkerrera hartu Garaibieko errepidea. Lehen Y bidegurutzean, ezkerretik jarraitu, haranaren zolan. Bide beretik jarraitu 2 km-tan, etxalde zenbaiten ondotik pasatuz. X bidegurutzean (8,7 km), errepide nagusia utzi eta ezkerreko Peko Oihana bidea hartu, Altzürükürantz. Laster, zubitik ateratzean, kontuz eta ezkerreko bidezidor harritsua hartu, Kaskaborro bizkarreraino igotzeko. Goian, Amiraneko bordaren bidegurutze bikoitzean (10 km), eskuinera hartu bi aldiz jarraian ("Kaskaborro" oinezko mendi-ibilaldia). Lehen jaitsieraren ondoren, gailur-lerrotik sigi-saga doan bide nagusitik jarraitu. Bide txiki batean sartzean, jarraitu ezkerrerantz 450 metroetan. Jaitsieraren amaieran (11,7 km), kontuz eta ezkerreko bide harritsu berria hartu. Ordoki panoramiko batera igotzen da, Ozkietako iratzelekura.

Iratzez estalitako zapaldan (12,2 km), haritz zahar batzuen aurrean, bide nagusia utzi eta ezkerretara doan bidexka belartsua hartu (zuhaitz zaharren azpitik igarotzen dena). Tarte panoramiko eder baten ondoren, lau bideko bidegurutzean (12,6 km), eskuinera jaitsi ibarxkara, pista harritsutik. Larramendia ibarxkaren hondoan (iturriak), zuzen jarraitu bide zabaletik 300 m-etan zehar. Zubia baino lehentxeago (13,8 km), ezkerretara hartu gorantz doan bide erdi asfaltatutik. Orduan, hesiz inguratutako pentzeen arteko pista harritsu batera iristen da. Bide asfaltatura iristean (bi haritz handiren azpian), eskuinera jaitsi bide asfaltatuan behera, eta 300 m beherago berriz eskuinera. Aphura errekaren gaineko zubia zeharkatu eta beste aldetik igo Mendi herrixkara. D147 errepidea eskuinerantz hartu, pilota plazaraino.

Justu Mendiko pilota plazaren ondotik, gurutzearen bidegurutzean (15,8 km), ezkerrera hartu Mendikotarantz. Adi, lehen jaitsieraren amaieran, bi aldiz jarraian ezkerrera joan, laborantza-lautadaren bihotzeko bide harritsutik ibiltzeko. Beti zuzen jarraituz, Idauze herrira itzultzen da poliki, herriko etxe zaharretatik, elizako auzotik eta lehengo eskolatik pasatuz. Aparkalekua ezkerrean dago.