Ainhoatik abiatzen den mendiko bizikletendako ibilbide honek all-mountain motako mendiko bizikletendako ibilbide modernoaren osagai guziak dauzka: bide ibilgarriak igotzeko, bidexka jostagarriak, bizikleta gutitan eskuz eraman behar, bizikleta bakarreko bidean jaitsiera panoramikoa. Egia da zati batzuek indarra eskatzen dizutela, Ainhoaren gainean goratasuna hartzeko edo Zuharreta lepora heltzeko (salbu pedalei eragiteko laguntza baldin baduzu), baina ardiak joaten diren pentze berdeetan, Bizkailuze mendiaren gainean ibiltzeko plazerak, bota dituzun indarrak laster ahaztaraziko dizkizu. Ikuspegia miresgarria da, argazkiak ateratzeko atsedenaldi saihestezina. Hor duzu, zure zain, antologiazko jaitsiera bat Haizagerri tontor-lerrotik, 2 km-ko bidexka zuzen bat mendiaren muinean, Larrunen parean, gidaritza eta ikuspegia batuz. Mendiko bizikletari trebeak loriatuko dituen kirol-itzuli bat.
Ainhoako pilota plazatik, karrika nagusi osoa igo, Herriko Etxearen aitzinetik pasatuz. Puntan, bihurgunetik ateratzean, ezkerrera joan norabide debekatutako karrikan (Garziako Inta). Kapera ttipiaren ondotik, eskuinera joan “kapera” geziz seinalatutako karrika igotzeko (Kaperako Bidea). Lehen “pareta” honen tontorrean, T itxurako bidegurutzean, eskuineko bidea segitu 100 m-tan, eta gero, ezkerraldean kaperara igotzen den bide harriztatua. Igoaldi bihurgunetsua zaila da. Gurutze zuri baten oinean (2,05 km), mendiko bizikletentzat seinalatutako bidexka eskuin utzi (GTPB) eta zuzen segitu iturri batetik (Ama Birjina) hurbil iragaten den bidean.
Arantzetako kaperaren ondoan (2,45 km), merezi duzun atseden itzaltsua hartu eta gero, hilarri eta gurutzeen gainetik ibili, eta eskuin aldean bi bidexka utzi, zuzen segitzeko bidexka belartsuan. Ainhoa ikusmenean duen bide lau batek du segida hartzen. Y gunean (3,25 km), eskuineko adarra hautatu eta 100 m urrunago, bidexka utzi, eskuinean den belarrean zut-zut igotzeko (bultzaldi). Harri mokorrean, bidexka ederra iratzeen artetik doa eta arditegi batetik hurbil-hurbil pasatzen da: eskuineko bidean igotzen segitu. Pasarte zut-zut baten ondotik (Larrarte iturria), eskuineko bide harriztatua segitu. Bihurgune bat marrazten du eta Hirukurutzeta leporantz luzaz zeharkatzen du (5km). Bide nagusia Atxulegiko hego-isurialdetik iragaten da (igoaldi eztia), eta luzaz jaisten da hurrengo leporantz.
Gainekoborda lepoko bost bideetatik (6,7 km), parean den erdiko bidea hautatu (lurrezkoa eta laua). Aterpe irekia oihanean, ezker. Bidea beste lepo batera heltzen da (7,1 km), eta igoaldi garbi eta zorrotza hasten du. Zuharreta lepoan (8,2 km), bideak utzi eskuin igotzeko, hilarri baten gainean, iratze arteko bide batetik (bizikleta eskuz eraman behar). Bidexka, urratsez urrats, tontor-lerro batera hurbiltzen da. Lehen konkorraren ondotik, Bizkailuzeko gain belartsuan ibil daiteke, arrunt hegoalderantz, Larrun eta Artzamendi ditugularik talaia gisa. Hiru gainaldeetatik iragan eta lepo baterantz jaitsi, 76. mugarria gurutzatuz.
Gorospil lepoan (10,65 km), beribilez ibiltzeko moduko bidea zeharkatu, arrunt eskuinera hartu iparralderantz itzultzen den bidexka lau batean. Lepo belartsu batera hurbiltzerakoan (pago bakartia), ezker segitu konkor baten bazterretik doan beste bidexka batean, Haizagerriko gaina aurkitu arte. Handik, jaitsiera zuzen gogoangarri bat hasten da. Arreta eskatzen duten zati arrokatsuen ondotik, bidexka maldatsua eta belartsua bilakatzen da, eta berriro harritsua, igo behar diren konkor batzuekin (bizikleta bakarreko bidexka iratzeetan). Beherean (13,7 km), borda baten azpian den pentzearen parean, bidea zeharkatu eta eskuinera jaisten den bidexka hartu; lur gorriko bide batera heltzen da, ezker segitu behar dena.
Arotzen auzoko bidean (14,2 km), 80 m jaitsi eskuinaldera eta ezkerrera joan lehen bidean (biltegia). Laster bidexka tekniko batek hartzen du segida (sustrai lerrakorrak eguraldi hezea delarik), oihanean murgiltzen dena. Beherean, zubixka eta gero, errepidea ezkerraldera hartu 1,4 km-tan, Lapitxuri muga-errekaren bazterretik. Kanadar pasabidearen ondotik (16,1 km), ezkerreko bideari kasurik ez egin eta zuzen segitu hein batean mundrunatua den bidean. Harrobien aldaparen tontorrean, zuzen jaitsi errepidean.
Dantxaria eta Ainhoa lotzen dituen D20 errepide bazterrera iritsi eta (17,35 km), errepidearen bazterretik zuhurki ibili eskuinaldetik Ainhoaraino. Arbonako patarratik iragaten da eta Ainhoako sarrerara laster heltzen. Karrika nagusiak pilota plazara eramaten zaitu.
Bistaleku idilikoan kokaturik, Arantzetako kapera, Andre Dena Mariari eskainia, artzain bati Ama Birjina agertu zitzaion leku batean eraikia izan zen, elorri zuri sasi baten erdi-erdian. Gurutze handiz eta euskal hilarriz inguratua da.
Xoldokogaina mendiarekin (Biriatu gainean), Mondarrain eta Atxulegiko eskualde hori betizuen azken gaztelua izaten da, euskal mendietan askatasun osoan ibiltzen diren behi basatiak. Abiadura moteldu behi gorri horiek gurutzatzen badituzu, ez dira mendiko bizikletak gurutzatzeari ohituak!
Lepoa baino doi bat aitzinago, 76 zk. mugarriak Espainiako lurraldeko sartzea seinalatzen du. Harri zabal baten ondoan kokatua da, iruinarri zahar bat etzanik, non ondoko idazkun horiek grabatuak diren: “Y” Itsasu adierazteko, “Ez” Ezpeleta adierazteko eta “BB” Baztan Bidasoa (Baztango ibarra) adierazteko.
Lapitxuri, Urdazuriko ibaiadarra den errekaren izena da, ehunka urteko zuhaitzen itzalean laguntzen zaituena. Izen hori eman zioten Dantxarineako diskoteka bati 60 hamarkada hondarrean, eta besta-kantu bat inspiratu zuen, ‘la Pitchouli” (dituen ortografia aldaera guziekin...).
Trait - Balisage directionnel sur supports locaux
Itzulia
Komunak
Ur-gunea
Ur-gunea
Piknika lekua
Ur-gunea
Natura (fauna, flora)
Erlijiozkoa